الشهم وسائق السياره الندل
قصه قصيره عن الشهامه والنداله
قصه واقعيه ترويها احد الفتيات
تقول الفتاهانا النهارده كنت راكبه احد المواصلات (ميكروباص ) فى الكرسى الاخير مع اتنين تانى جنبى فى نفس الكرسى بنوته زى القمر ووزنها زايد ( سمينه شويه) وشاب تلاتينى
والمفروض ان الكرسى ده بيساع اربعه فكل م السواق يوقف لواحد ويقوله اركب رابع ورا لان المفروض ان ده المكان الفاضى فى العربيه كلها
الراكب يحاول يتحشر وسطنا فيضايق فينزل
قله ذوق السواق
قام السواق اخر ما غلب ضرب كف على كف و قال بمنتهى قلة الأدب وقلة الذوق اللى فى الدنيا(انا غلطان المفروض الواحد يعاين الركاب قبل ما تركب ويركب السمبتيك بس) كان بيرمى الكلام ع البنت اللى جنبى علشان (سمينه شويه)
اقسم بالله الجمله دبحتنى كل اللى عملته بصيت ع البنت دى بصه سريعه لاقيتها بتدخل باسورد موبايلها غلط اكتر من مره بمنتهى الارتباك
لاقيت السواق البجح بيديها الضربه القاضيه وبيقولها "يا ابله هتدفعى أجرة اتنين ولا ايه الكلام"
قامت البنت ردت عليه بمنتهى كسرة النفس والكسوف وقالتله اللى تشوفه بنبره غالبها الاحراج
رد البطل
كنت انا خلاص هرد ع السواق قليل الذوق ده لاقيت بطل زى اللى بييجوا فى الافلام كده فى اللحظه الاخيره فى الكرسى اللى قدامى بيقوم من النوم وبيشيل الاشعه من تحت دماغه وبيظبط (العمه ) اللى فوق راسه وبيطلع منديل قماش بيمسح بيها تجاعيد وشهوبيقول للسواق بلهجه صعيديه بمنتهى الجبروت عارف يا واد لو كنت انا سواق وكانت دى عربيتى وانت شاورتلى ووقفتلك وانت ركبت وجيت تدينى أجره عليا الطلاق ما كنت خدت الاجره منك مش كرم منى لا سمح الله
بس عشان مينفعش تتحسب عليا نفر او راجل عشان انت ولا نفر ولا راجل انت تركب عربياتنا من غير ما نشوفوك بنى ادم
جبر الخواطر
لكن البت اللى ورا دى اللى عمال تقولها هتدفعى أجرة نفرين وتلقح عليها زى الحريم انا لو مكانك ادفعها اكتر عشان هى بمقامها واخده اكتر من كرسى فتتحسب عليا اكتر من واحد لكن انت واطى وقليل الادب وناقص ربايه والقرش الطالع من جيبك يحرم عليا اسكنه جيبى هاخد فلوس من واحد مش عارف جنسه اذا كان راجل ولا ست؟طب سيبك الجنيه بتاعك لو كنت انا سواق كيف عاوزه يسكن وسط الفلوس اللى فى جيبى عاوز فلوسى فى جيبى يصيبها العطب يا معطوب
ابتسامه الملهوف
ساعتها ابتسمت ابتسامه وفرحت فرحه غريبه والأغرب ان السواق مش عارف يرد رغم الاهانه دى كلها مش عشان الجد العجوز مش مديله فرصه بس جايز عشان كلامه منطقى ومالوش ردقام فجأه السواق قال للجد العجوز انت فى مقام ابويا ومش عاوز ارد عليك.. قام الجد قاله ترد كيف و دى معايا وطلع مسدس من جيبه وقاله يمين بالله خساره فيك الطلقه ودمك الخالى من الاصول هترفضه الأرض ومش هتشربه يا ناقص لكن لو حتمت هسكن الطلقه فى لحمك النجس
سلبيه الناس
ركاب العربيه ساعتها بدأت تقول للعجوز يصلى ع النبى وخلاص يعنى خد للبنت حقهاقام سكتهم كلهم وقال انا كنت عامل نفسى نايم وف حالى ومستنى دكر فيكم يرد ملقيتش قمت انا رديت عشان ودانى فى الصعيد ربوها متسمعش الغلط وتعديه.
هى وزنها زايد وبمزاجها تقدر تخس لكن انتوا العار عندكم زايد كيف هتخسسوه يا محسوبين علينا رجاله
الفضول القاتل
حسيت انى هموت واشوف ملامح البطل اللى مدينى ضهره و اللى اخد حق البنت وزياده فلاقيت الجد بيبص للبنت اللى جنبى وبيغمزلها غمزه طفوليه بضحكه تجنن قامت البنت ضحكت وردت فيها الروح
المهم انى اول ما شوفت ملامح الجد عرفت ليه السواق معرفش يرد عليه اقسم بالله وبدون أفوره لو قولت ان دى اكتر ملامح حاده شوفتها فى حياتى ما هكون كدبت عيون خضرا مرسومه وسمار متوزع بشكل جميل على ملامحه ودقن غلبها الشيب ملامحه جميله وحاده فطبيعى يخاف منها الاندال
الجد بعدها بثوانى جاله تليفون قام قال للسواق والله ما شالنى منك غير يوسف ورد ع التليفون وقال اذيك يا يوسف يا حبيب جدك متخافش الدكتور طمنى وقالى انى كويس اسبوع وهجيلك يابن الكلب وحشتنى.
قفل المكالمه من هنا وقال للسواق بتلكيك باقى ربع جنيه من فلوسى الحره هاتوا قام السواق بعتله الربع بمنتهى الهدوء
قام الجد حط دماغه ع الاشعه تانى ولسه بيجهز نفسه للنوم قام بص للبنت اللى جنبى وقالها يلعن ابو اللى جاب اللى يزعلك يا( جمر)
منقول من بنت في الجامعه
الشهم وسائق السياره الندل
إرسال تعليق
يسعدنا زيارتك للمدونه وتعليقك على المنشورات